EL CARRU D´ESQUIRPIA

¡Ay, carru d´esquirpia que baxu del horru,

escuendes les penes de vete tan vieyu;

y, bruxu y medranu, abaxes el morru

furtiando la Guaxa que va de corteyu!

¿Fuxeron po´l mieu les xixes aquelles,

que veute tan triste, co´l güeyu tan gachu?

O ¿ye que camientes que vales p´astielles

y temes te fiendan co´l filu del hachu?

¡Son tantes les veces qu´a coru cantamus

que, vete ya mudu, me pon afetau!

¡Y tantus los añus qu´al par la gozamus,

que xiblo de mieu al vete tan dau!

¿Recuerdes miós vaques, la Pinta y Careta,

que´m tantes xornades llevaste xuncides?

¡Oyir la tu voz, tan dulce y tan neta,

y taben al puntu les dos encoyides!.

Añoru les tardes que taben tranquiles,

y dibes caleya p´alantre cantandu,

el par de mayuelus, pendientes d´esquiles,

faciente coru, atinguilixandu.

Callaba la Xente, de gozu plasmiada,

dexando paraus preseus de llabranza...

que valga dos cuartus, en so comparanza

Reinaba´l silenciu per toda l´aldea;

ni´l ruidu más sele en ella sonaba.

El páxaru vecin nos daba la idea

de tar escuchandu, pos siempre callaba.

¡Que lexus los tiempus de cuandu cantabes

lo mesmo qu´un mozu sin plizca de xuiciu!.

¿Recuerdes les altes endeches qu´echabes

baxando po´l monte, cargau de vericiu?

¡Ay, tiempus pasaus que, dandu trancades

fendíes caleyes, con rixu de bracu!

Agora , ¡probín!, tos ruedes ferrades,

desfáiles la comia, buracu a buracu.

Y otres tamién, qu´al par que corcobus

filabes endeches con rixus xabatus;

con elles, tornabes de lexus los llobus;

si hoy les echares, non tornes, nin gatus.

¡Ya venu la mala! Tas llen de mazquetes,

y fáltante ya los cuatru estadoñus;

por todus los llaos ensiñes resquetes,

y casquen los fierrus picaus de ferroños.

¡Qué penes me dan tu pértiga rota

y el secu rodeznu que tantu cantara,

u queda sin voz, pa siempre, la nota

que´l puxu postreru, ya llista dexara!

(Eloy F. Caravera)

Avilés 1.887