LES BODES D´ORU

LES BODES D’ORU

¡Abre el arca, mió galana!
¡Traime la llave, mió vieya,
Qu’anque tiémblenme les manes
Acierto con la pesllera !
¿Qué te pasa ? ¿non l’atopes?
Regüelve n’a faltriquera,
Que d’afechu la palpaste
Y no atines a coyela.
Ya sé que non tás en ti,
¡Crees que non me di cuenta!
Que pasaste toa la noche
Sin poder dormir, en vela.
Anque cerrabes los güeyos,
Yo tengo muncha experiencia
Pa non goler los motivos
Que te traíen despierta.
¡Sabe Dios les añorances
Que rumiabes n’a mollera!
Tamién yo en cavilaciones
Pasémela muy alerta.
¡Di más güeltes en el catre
Que un tíu-vivu de feria
Son munchos años, rapaza;
Diez llustros son, mió melguera,
Munchos díes, munches hores
Que hierven e’na sesera
Ye muncho pa revivilu
En esti día de fiesta.
¡Anda, apúrreme la llave!
Vamos a abrir la pesllera,
Los dos xuntos, muy xuntinos,
D’esta arcona milagrera,
Que guarda adientru el milagro
D’una rosa siempre fresca;
La de nuestros amoríos,
El signu d’aquella fecha.
¡Non faigas tantos remilgos,
Non seas paraxismera!
Vamos a sacar les gales
Con qu’el cura nos xunciera
Fai hoy cabal mediu siglu.
¡Ay Dios, una vida entera!
¡Qué día aquel, mió vieyina!
Nunca ví al sol que lluciera
Como llució n’aquel día
En que te llevé a mió vera
Y ante el altar mismamente
Añudamos la cadena
Que xuramos non frayar
Ni en el cielu ni en la tierra
Que si ye dogal p’algunos
Pa nosotros ye diadema
Engarzá con arrumacos
Y de ternuras enllena.
¡Cadenina d’oru finu,
Que nin s’empañó siquiera!
Cadena que non amarra,
Cadena de lluces fecha,
Cadena que non fai ronches,
Cadena que non aprieta.
!Cadena que nin la muerte
Será capaz de rompela!

Alcuérdeste d’aquel día…
!Non vas recordalo, vieya!
¡Que repique de campanes!
Solmenábase la iglesia
De tantu dar al badaxu
El diablu de la reciella.
¡Qué de cuetes! ¡Que estampíos!
¡Cuetes, dientru! ¡Cuetes, juera!
Los de dientru n’el mió pechu
Qu’estallaba de maxeza.
¡Dábenme unos regolvinos
Desde el calcañu a l’oreya
Que nin de neñu pequeñu
Te xuro yo los sintiera!
Non creo que xamás hubo
Mozu que más presumiera
Comu presumí aquel día
Que te llevaba a mió vera.
¡Llevábate yo agarrá
Talmente comu a una reina!
¿Y qué cosa siempre juiste
Pa esti mozu de fachenda?
¿Hubo otra moza más guapa,
Más xentil, nin más parlera
Que traxese tan en xaque
A la mocedá entera?
¿Quién llucía unos colores
Más frescos qu’una reineta?
¿Quién yera la flor del mundu?
Arrespuende, dí ¿quién yera?
¿Quién tenía unos papinos,
Nidios como la mantega?
¿Cuála la más fachendosa?
¿Cuála la más gayaspera?
¿Quién facía a les calandrias
Callar, si entonaba ella?
¿Quién tenía n’el conceyu
Otra risa tan melguera?
Quién entamaba n’el baile
Entre los mozos, pendencia,
Porque todos, xatanciosos,
Querían bailar con ella?
¿Quién…? Pero en fin, arrespuende,
Contéstame, principesa.

Y el mozu ¿non lo valía?
¡Como te poníes de tiesa
Cuando diba yo a sacate
Pa bailar d’alguna pieza!
¿Quién trenzaba el xiringüelu
Con más gracia y ligereza?
¿Quién daba los ixuxús
Con más juerza en toa l’aldea?
¿Quién manexandu el verdiascu,
Y con la flor e’na oreya,
Entrando pe los contrarios
Solmenába-yos más leña?
¿Quién llera el burru, más burru
Pa facer coses de juerza?
Por quién facía arrumacos
Toda moza casadera?
¿Non ye la pura verdá?
¿Non ye la verdá, mió prenda?
¡Enjuaga esi llagrimón!
¡Suelta d’una vez la llengua!
En sin baxar a denguno
¿Non tenía yo maxeza.?

Non te pongas colorá.
Non te dé vergüenza, neña;
Pero de fixo t’acuerdes,
-¡Olvidálu, güeno juera!-
Del besu que tras la puerte
Te robé la noche aquella.
¡Cuantos remilgos hiciste!
¡Cómo facíes la inxenua!
Cómo, alloriá, n’os mios brazos
Desmayástete en comedia!
Y todu ¡RETEBRIBONA!
Pa qu’el besu repitiera.
Y bien que lu repetí.
¡Quién otru, tal non hiciera!
¡Cómo me supo aquel besu!
¡Qué dulcín y suave yera!
Cuandu quiero recordalu
Paso p’el llabiu la llengua
Y entovía chupo miel.
La miel que me diste en prenda
D’aquel fechu vergonzosu
Que te fizo tanta afrenta.
¡Ay, recundenaes muyeres,
Ni el diablu que vos entienda!
¡Cuand’ún aspera un guantazo
Dais el cielo e’na ocurrencia!
¡Cuántes rises, cuántes penes
Nos trai recuerdu esta fecha!
Pero…, vamos a dexalo.
Vamos vestinos de fiesta,
Con les ropes que punximus
Fai mediu siglu, ¡mió reina!
Déxate de lloros, ¡boba!
¿Llágrimes tando contenta?
¡Si somos un par de mozos
Anque el ruma nos amuela!
Allegra esi corazón
Qu’esti día ye d’andecha.
Vamis vestinos de gala
Y olvidar nuestra vieyera.
¡Anda, apúrreme les llaves!
Que del arca milagrera
Vamos a sacar les ropes
Con qu’el cura nos xunciera.
Tarán ya un poco folgaes
Pa vestiles n’esta fecha.
¡Si non podemos vestiles
falaguémosles siquiera!
¡Abramos los dos el arca,
Esta arcona milagrera
Que guarda tantos recuerdos
Que tantes diches encierra!
Aférrate a la mió mano
Que tá dura la pesllera
Y nuestres juerces son poques.
Non tiembles…!hala!, una güelta…
Apóyate n’el mió pechu…
¡UNA!...
¡DOS!...
¡TRES!...
YA TÁ ABIERTA.

Matías Conde-Nació en Gijón el 3 de noviembre de 1.896. En 1.937 pasó a Francia y más tarde a Méjico, "Su poesía compuesta toda ella en el habla dialectal de los medios populares de Gijón".