lunes, 10 de mayo de 2010

LA PANERA VACIA

LA PANERA VACIA

La panera tá mustia.
Tá olvidá la panera.
Tá llorando en silenciu,
Sin quexíos, severa.
Todu, aller, yera orgullu.
Todu, yera fachenda.
D’altivez reventaba;
Rinchaba de soberbia.
Tal yeren les sos gales;
Tal yera so riqueza:
Faneges de fariña,
Chorizos en mantega,
Copines de castañes,
Y vares de morciella;
Xamones y tocinos,
Manzanes de reineta.
Todu esto dientru taba
E’na panza repleta;
Que panoyes en riestres
Colgaben per ajuera.
¡Ay,Dios! Comu llucía.
¡Ay, Dios! El que la viera
Con trences d’oro y plata
Faciéndose la neña.
¡Y cómo tá hoy la probe!
Talmente ye una vieya.
Antier fecha una moza,
Gallarda y gayaspera;
Hoy tá esturniá, encoyida,
Solina, triste, seca.

La panera, vacía,
El so esqueletu muestra,
De tables de castañu
Qu’arrestallen de pena,
Un pocu pe los años,
Un munchu de tristeza
De vese solitaria
En mediu de l’aldea.
El rodar de les llágrimes
De la triste panera
Punxo manches de musgu
N’os pegollos de piedra
Enantes siempre blancos
Igual que la patena.
La panera no escucha
E’na noche serena
Los ixuxús valientes
Qu’en víspera de fiesta
Gritaben los rapazos
Con ganes de pelea.
Si hay mozos, ya non griten,
Qu’hoy llora toa l’aldea.
¡Quién tien ganes de rise
Si el corazón tá en pena!

La panera, en olvidu,
Vacía y sin fachenda,
Xime tras la corrada,
Hoy restu de l’hacienda
Que vendióse o …¿Quién sabe?
¿Quién diba a defendela?
De l’antigua casona,
De vida toda enllena
Dispareció la xente,
Hoy nadie, en ella, queda;
Unos, penen n’a cárcel,
Tán otros, vaxo tierra,
Algunos pe los montes,
O, allá, en tierra extranjera.
D’aquel solar tranquilu,
Qu’anantes la paz fuera,
Non queda otru vestigio
Qu’esa mustia panera,
Vacía, solitaria,
Señal d’una tragedia
Qu’entovía lloramos
Y nos seca la llengua;
Esta llengua juiciosa
Que’na boca ta presa,
Que maldiz unes veces
Y que otres veces, reza.
(Matías Conde)

No hay comentarios:

Publicar un comentario