RIMAS REFRANES Y COSADIELLES DE GÜAJES

Muchas de las rimas corresponden a juegos de cuello

Arre borriquín

pa la casa´l to padrín,

comerás y beberás

y a la nueche dormirás;

arre, arre, arre,

que llegamos tarde

-------------------

Esti topó un güevu,

ésti sacólu

ésti pulgólu.

---------------------

Esti ye´l moñín,

ésti´l so sobrín,

ésti´l mayor de toos,

ésti´l furabollos

y ésti´l matapioyos.

----------------------

Una vez yera un rey

que tenía tres fíes:

vistióles de coloráu

y tiróles al teyau.

---------------------

Pepe rote

arraña´l pote;

arrañalu bien

pal añu que vien.

----------------------

Serrar, serrar

Martín de Villar,

cortar cabecines

y tirales a la mar.

Los del rey sierren bien,

los de la reina tamién,

los del duque

truque, truque.

---------------------

Arquina pequeña

de buen parecer,

ningún carpinteru la puede facer,

sinon Dios del cielu

col so gran poder

¿Qué cosa cosadiella ye.?

(La ñuez)

-----------------------

¿Qué cosa cosadiella ye?

Nel monte de Quirós

hay un arbolín deDios;

cada caña tien un ñeru,

cada ñeru tien un güevu,

cada güevu un paxarín,

¡válame Dios qué arbolín!

(l´ablanu coles ablanes)

--------------------------

¿Que cosa cosadiella ye ?

Una muyer remolona

con un diente na corona,

a cada vuelta que da,

tola xente s´amontona.

(La campana la iglesia)

-------------------------

¿Que cosa cosadiella ye?

Tol añu ruque, ruque

y pa una risada qu´eché

perdí tolo que gané.

(l´oriciu la castaña)

---------------------------

JUEGOS DE NEÑOS

(l´estira cuerdes)

Cueyense tolos xugadores de les manes formando una rueda, dempués de sacar un d´amu y otru de criáu ente los que s´entama´l siguiente diálogu:

-¡Periquín, mio criáu!

- Diga usté, señor mio amu

-¿Cuántos panes hai en fornu?

- Venticincu y el quemáu

- Y el quemáu, ¿quién lu quemo?

- Esti pícaru malváu (siñalando a ún de la rueda)

- Pues a retorcé-y el rau

-Rau,rau,rau,rau (toos)

Rónpese la rueda per onde ta l´amu y ésti, llevando con él dellos neños, cruza la rueda per onde ta´l "culpable", que va quedando nel medio la fila colos brazos cruciaos sol pechu y tirando d´ellos con fuerza los neños que tien a los llaos, que van diciendo "rau", "rau" hasta qu´l culpable queda "aforcáu".

EL SILLÓN DE LA REINA

Entre dos neños faen un "sillón" agarrándose ún al otru peles muñeques colos brazos cruciaos.

Nesi "sillón" siéntase un de los otros neños, que va faciendo comu que se peña mientres los otros entamen a pasialu canciando:

Al sillón de la reina

qu´enxamás se peña

un día peñose

y el sillón rompióse.

El que va sentáu tien de facer por nun cayer cuandu acaba´l canciu, yá que los portadores, nesi momentu, soltarán de un sutrucu les manes.