ASTURIAS - MINA - MAR - VIENTO

Yá ta tapeciendo, Asturies

Pol mio corazón adientro,

Fáenme yá sombra les penes,

Y non t´alcuentro.

Quixe ser como tú yes:

Foces, picos, mar y viento.

Fueya, yerba na campera,

Pino y carbayu en Somiéu,

Mazaricu na Gaviera´

Palomba nel Escampleru;

Sentíme migaya en Peñes

Sentíme n´Ovieu enteru,

Nada na Foz de Moñacos

Y tou en Torrecerreo,

Fundíme como tos foces,

Alzame como l´Urriellu:

Ser pequeñu con lo humilde,

Grandón con el altaneru,

Apacible col benditu,

Col babayu pendencieru,

Xenerosu col amigu,

Con el tiranu, guerreru

Quixe ser como tú yes:

Borrina, llume y formientu

Pero agora sólo pueo

Desvivime nel recuerdu:

Ver cómo reblinca´l Cares,

Amoriar baxo un lloréu,

Oyer esquiles en Ponga,

Dexame morrer en Viegu.

Quixe ser como tú yes:

Borrina, llume y formientu

Y agora, que toa t´empines

Llamando a conceyu abiertu,

Agora, Asturies del suañu,

Nin t´alcuentro nin m´alcuentro.

Por eso vengo decivos

Coles vidayes ferviendo;

¡Díi buscala vosotros!

Que yo yá non tengo tiempu:

¡Díi alcontrala vosotros!

Que yo téngola yá dientro.

¡Díi facela!

Y facéivos

Como Asturies,

Llibertá

Borrina,llume y formientu.

(José Benito Alvarez Buylla)